Waxay Ahayd In Xalay Nala Xidho, Laakiin, Way Baaqatay, Inj. Maxamed Xaashi

Friday, 27 July 2007

'Waxay Ahayd In Xalay Nala Xidho, Laakiin, Way Baaqatay,' Inj. Maxamed Xaashi

Inj. Maxamed Xaashi Cilmi oo ah Guddoomiyekuxigeenka ururka Qaran ayaa xaqiijiyey inay jiraan warar ilaa maanta soo baxayey oo sheegaya in Xukuumaddu ka xalaalaystay Maxkamadda Gobolka Hargeysa amar lagu xidhxidhayo siyaasiyiinta hoggaamisa ururka Qaran, amarkii qabashadoodana la bixiyey.

"Arrintaasi siday nagu soo gaadhey waxa weeyaan, Waarankii iyo wixiiba waa u diyaar, kolkaa in nala xidho xalay bay ahayd, xalay way ka baaqatay, " ayuu yidhi Inj. Maxamed Xaashi oo caawa saxaafadda la hadlay.

"Welise, waa arrin taagan, siday wararku nagu soo gaadheen, " ayuu raaciyey.

Maanta duhurnimadii ayaa waxa soo baxay warar sheegaya in xukuumaddu Maxkamadda ka soo qaadatay warqadda qabashada, Dr. Maxamed Cabdi Gaboose oo ah Guddoomiyaha ururka Qaran iyo Inj. Maxamed Xaashi oo ah Guddoomiyekuxigeenka ururkaas.

Ma jirto cid rasmi ahaan xaqiijinaysa jiritaanka go'aankaas, dhinaca xukuumaddana wax war ahi kama soo bixin.

Inj. Maxamed Xaashi oo la weydiiyey in loo yeedhay ama cidi u timi, waxa uu sheegay in aanay jirin cid u yeedhay iyo cid u timi midna, balse, waxa uu muujiyey inay ka go'an tahay xukuumadda inay xidhxidho hoggaamiyayaasha ururkaas.

Tan iyo Salaasadii dorraad, markii siyaasiyiinta ururka Qaran ay fagaare ku yaalla xaafadda Axmed Dhagax ee magaalada Hargeysa kala hadleen dadweyne isu soo baxay, waxa soo baxayey warar sheegaya in Madaxweyne Riyaale kulan isugu yeedhay madaxda hay'adaha Amniga – Booliska, Xeer Illaalinta Guud iyo Sirdoonka Qaranka – waxaana la sheegay inuu kala tashanayey sidii tallaabo looga qaadi lahaa siyaasiyiinta ururka Qaran.

Ururka Qaran oo dalbanaya, una ololaynaya in la furo ururrada siyaasadeed, si ay uga qaybgalaan tartanka doorashooyinka deegaanka ee soo socda, waxay Wasaaradda Arrimaha Guduhu dhowaan ku wargelisey in la mamnuucay dhaqdhaqaaqyadooda, haddii ay joojin waayaana maxkamad la horgeyn doono.

C/risaaq M. Dubbad, Hargeysa.
E-mail: dubad@Somaliland.com

ISW: Somaliland.Org

http://www.somalilandcenter.com/content/view/4198/73/

Madaxdii ururka Qaran oo xadhig lagula kacay, ka dib markii Dastuurka dalka ay ku dhaqmeen, ku dhaqa

Saturday, 28 July 2007

Madaxdii ururka Qaran oo xadhig lagula kacay, ka dib markii Dastuurka dalka ay ku dhaqmeen, ku dhaqankaas sharciga dalka oo danbi ka ah dhanka xukuummadda.

28 July, Hargeysa:

Abaara 7 subaxnimo ee maanta ayaa ciidan dharcad ah oo kuwa loo yaqaan CIDdu u kexeyeen Dr. Moxamed Cabdi Gaboose Maxkamadda Hargeysa. Dr. Gaboose waxa uu Maxkamadda weydiiyey AMARKA Maxkamadeed ee lagu soo xidhay, Xaakimku wuxuu sheegay inuu amarku jiray balse aanu haynin markaas oo sarkaal kale hayo, sidaa daraadeed aanu tusi karin. Siday weriyaal halkaa joogay sheegeen, xaakimka ayaa amray in la xidho, askartii dharcaduna intay soo tukhaan tukhiyeen ayey ku rideen gaadhi yar oo nooca loo yaqaan Mark IIka ah. Waxay askartu markii hore u kexeen Dr. Gaboose dhinaca bari ee magaalada wadada Berbera u baxda, hase yeeshee markii dambe waxay ku xidheen saldhiga booliska ee Kilinka shanaad ee dhinaca Naasa Hablood ka jirta Hargeysa.

Engineer Moxamed Xaashi Cilmi isna saaga gurigiisa ayaa ciidanka SPU ee loogu talagalay argagaxiso la dagaalanka iyo ilaalinta ajnabiga loogu geeyey gurigiisa ku yaala qaybta Maan-Soor ee Hargeysa. Dhalinyaro badan oo halkaa joogtay ayaa iska hortaagtay inuu ciidankaasi kaxeeyo. Hase yeeshee markii dambe Moxamed Xaashi waxa uu ogolaaday inuu gaadhigiisa isaga oo wata Maxkamadda tago. HALKAAS oo imika ku sii jeedo isaga oo ciidan Boolis ah daba socdo.

Wixii ka soo kordha waanu idinla socodsiin.

Xigasho: Waaheen.com

http://www.somalilandcenter.com/content/view/4200/73/

28 July 2007 Waa Maalin Taariikh u ah Distoorka Somaliland

28 July 2007 waa maaliin taariikh u ah distoorka Somaliland, maaliintaas oo taariikhda Somaliland geli doonta waayo waa markii u horaysay ee la xidhay siyaasiyiintii u soo halgamay wadanka oo ku leh calan dahab ah taariikdha Somaliland lagana dhigay political prisoners. Maalintani waa maalin lagaga xadgudbay xuquuqda siyaasintan lana jabiyey xuquuqda distoorka u yaala Somaliland.

Maanta lama odhan oran karo waa maalin buuq iyo halaag ka dhici karo Somaliland (Ilaahay balaayo kasta ha ka hayo Somaliland, Aamiin) laakiin waa maalin taariikhda Somaliland galaysa. Waxay maalintani la xisaabtami doontaa in wadadii dimuqraadiga ahayd eey Somaliland ku soo caano maashay uu difaaci doono dastuurka u yaala Somaliland kaasuu difaacayo xuquuqda muwaadiniinta u dhashay Somaliland. Suaashaa waxaa inooga jawaabi duruufaha ina soo mari doona marka laga bilaabo 28 July 2007 iyo inta ka hadhay doorashada Somaliland ee dhici doonta 2007.

28th of July 2007 waa maaliin taariikhi ah ooy ka faaiidaysan doonaan dhalinyarta u soo koraysa wadanka Somaliland. Waxay maaliintaa ka baran doonaan taariikhda iyo halganka loo soo maray dimuqraadiga Somaliland. Waa taariikh geli doonta oo laga akhrisan doon inta uu wadanka Somaliland jiri doono Insha'Allah. Maalintani waxay qiyaasi doontaa inay dimuqraadiyada Somaliland ay iskeed iskugu taagi karto lugaheeda iyo inkale.

Ummad kasta waxa lagula xisaabtamaa sida ay uga soo baxdo maalintan oo kale waxaanu filaynaana in shicbiga Somaliland ee dahabka ahi ay had iyo jeer ay taageeri doonaan dastuurka Somaliland ooy dhabarka u dhigtaan wax alaale iyo wixii dhibaato ah ee kaga yimaada geediga ay u galeen inay Somaliland dimuqraadi ku caano maasho.

Somaliland baa Guul

Mahadna Eebe Rahman baa leh.

Waxaan Ilaahay uga baryaynaa in ay had iyo jeer Cadaalad Xaq ah
iyo Xoriyadi ka jirto Qaranka Somaliland, Aamiin.